Poèmes / Barzonegoù

Charlez ar Gall (1921-2010)

in Jeanne-Marie Guillamet, L'Argolienne, éditions du Liogan, 1992

Da vleo 'zo gleb war ma chod
'Vel bezin du ha flour.
Eet eo ar mor e traoñ an aod
Da vleo 'zo leun a zour ;
Med diwar ma dorn an trêz re skañv
A nij pell o kas d'e heul an hañv ;
Eur mouch-avel a ra din krena.
Da benn a bouez war ma breh
O kreski ma hirêz.
'Man deut ar skreo war-nij er hreh
Da benn 'zo kouezet fêz ;
Med siwaz evel ar bili tomm
Ma halon bremaig a ranko chom
E-unan-penn pa deuio an noz.
Ar mor a bigno warhoaz
Ha gand al lano taer
He bleo a neuio war he skoaz
'Vel bezin tonn – ken kaer ;
Med ar bili bremañ zo deut yen,
Steuziet ar skreo ha morse ken
Ne gavin frealz e ziouaskell.

Argol, 1958

• Nevez-amzer, 1954
• Dichal, 1958
• Hetou nevez ha rimadellou arnevez, 1982
• Bleo va haredig, 1985
• Barzoneg kañv, 1991
• Ajkuk, 1993